二當家 ｜ 瘋言瘋語 – 為何要有通脹?
匯君兄既第一場 LIVE 完成, 當中大部人問題都係……..質素偏低, 但老實講, 匯君兄呢個 LV 既人, 市面上98%既聽眾都未必夠佢一半, 再加上主題都係講財經, 而匯君兄係呢個行業內深造既人, 普通人既問題點會考得起匯君兄。
當中其一有條問題係講, 點解要設定2%通脹, 匯君兄嘗試去回答, 話係一種「隱藏性稅項」, 尤其係政府都係發債度日, 通脹有效咁去減低個 IMPACT, 亦即係我今日去借$100, 每年還息2~3%, 30年再還本金 $100, 同樣$100, 購買力可以等於30年前既購買力 55%。
而二當家除左覺得以上既解釋外, 從人性上去睇, 人要有進步既動力, 如果好似日本咁0通脹咁多年, 工資0增長, 成個社會就會無生氣, 企業加唔到價, 就只能削減成本, 或保持盈利持平, 久而久之, 成個社會失去進步既動力。
資本主義社會雖然話就話係保護個人財產, 但實際上我覺得係鼓勵競爭, 並由競爭及貪念去帶動社會進步。試想想, 如果我有層樓, 個兩餸飯咁多年都係 HK$30, 唔加價, 我又明知我人工唔會有得加, 人工就O岩O岩夠我食下兩餸飯, 上下網, 得閒最多去買件壽司, 呢個其實亦係另類躺平。「躺平」亦即放棄進步, 呢個係每一個社會都怕既結果。
而通脹就係迫駛你去進步, 因為不進則退, 一方面我保護你個人財產, 另一方面通脹減低你財富既價值, 而財富既價值就係 購買力。
現實係殘酷, 所以二當家現時既投資目標並唔係利潤最大化又或者 BEAT THE MARKET, 而係 BEAT THE INFLATION! 要發達, 請做生意, 又或者開槓桿, 別無他選! 打得工既就預左餓你唔死, 頂到盡俾你做個專業人士, 就算係專業人士, 又有幾個多係可以成為「月球人」。
至於點解係 2% 通脹目標, 我同匯君兄講未必有科學根據, 純粹係就經驗所得, 正如本文上圖一樣, set the right target, 太近, 人唔駛努力就得到, 太遠, 人又會失去努力。而香港樓價, 就正正係將個目標放太遠, 而令到好多社會人既年輕人失去動力。 而於香港通脹好似只計消費物價, 而無包租金/房價既上升, 而香港人好多都用 30% 以上既收入去付房租, 所以個通脹率只能参考。
