二當家 ｜ 家人與健康, 工作與壓力
先祝大家, 蛇年快樂, 長搵長有!!!
2025年第一個 POST, 拖左好耐, 連一月份既月結都無做, 今日終於的起心肝亂寫一下!
首先, 二當家係一月份放左一個假, 係拋妻棄子果隻, 隻身去日本玩左一星期, 好耐, 好耐, 好耐未試過咁樣去渡一個假。玩梗係開心, 但都掛住屋企人, 長期積落黎既壓力, 疲勞, 可以係放假期間暫時放下, 到宜家我都仲回味緊果個星期。
新年前, 本身係歡歡喜喜咁準備過年, 突然收到電話, 某位家人突然中風入左院。果位家人都係大二當家幾歲, 半邊身唔郁得, 雖然係黃金三小時內入院, 但傷害已經造成, 暫時去左復康醫院, 但長遠都係有人長期睇住。 呢件事不禁令到二當家嚮起警號, 因為如果有保險, 都仲可以頂一陣, 但係長遠黎講可能會少一份收入。如果我係中風果位, 咁O岩我又供緊樓, 咁又點算? 心中有無數個問號。預計要審視一下自己既保障, 如果真係買樓, 可能要先加大個保額。
另外, 大當家個病情又再反覆, 本身佢個病係免疫力系統相關, 可以咁講, 係無完全根治既方法。 一直都食緊類固醇, 當然亦有試唔同既坊間療法, 主要目的都係減少發炎既可能性。但免疫力相關既疾病可以隨時攻勢身體任何部位, 所以要長期監測住個情況。 大當家基本上日日朝早都要探熱, 因為一發燒就可以代表身體既發炎反應。係新年過後, 大當家情況又轉差, 當中有D 反應係真係非常令人擔心, 暫時大當家入左院做 CHECKING, 乜都要 CHECK, CT, MRI, 驗血, 驗眼, 驗小便…..雖然係無即時既危險, 但都希望大當家身體健康, 早日出院!!!
至於小弟, 放假之後就即刻進入工作 MODE, 朋友同我講唔好咁上心, 做得幾多得幾多。 二當家有時都反思, 其他人既事關我乜事, 上面有一班老闆, 下面有一班下屬, 橫向仲有唔多部門既人。 大家都有大家既辛苦, 下下諗埋人地果份, 公司好唔好我又無得分既, 何不進入老屎忽MODE…. 暫時二當家都未過到自己果關, 做人做事, EGO 既影響好大, 好多人都擺老闆款, 例如「我唔同你傾, 因為你唔係我個LEVEL, 你話唔到事」等等, 有部份就開口埋口用大老闆壓落黎, 大公司, 大把牛鬼蛇神, 有時擺下姿態都係為左對自己好, 二當家太平易近人反而俾人到無到。
國際大事, TRUMP TRUMP 當選, 杜魯多收工, 大 S 去世, DEEPSEEK 既出現仲要股壇長毛, 好多好多野都想講, 但係如果無健康既身體, 無家人, 無自己既時間, 一切既國際大事都係 2nd priority, 二當家暫時仲可以頂住壓力, 但長期係咁絕對唔健康。要轉會, 收入又分分鐘斬半, 所以都係頂得一日得一日!
