二當家 ｜ 見聞 – 一樣米養百樣人
近日的士團體又再嘈白牌車， 二當家平日都係坐公共交通, 但如果有得揀, 不論台灣定香港, 我都會揀UBER 而唔揀的士/小黃。 主要原因大家都講到口臭, 態度問題, 揀客, 衛生問題等等, 一邊廂的士商會叫政府監管白牌車, 又唔見佢地叫政府監管下揀客問題, 過海唔過海已經玩死好多人, 而且個問題唔係「部份」司機, 而係「大部份」司機, 個人經驗, 不愉快比率高達75%。
而坐UBER, 有陣時都會同司機吹吹水, 香港同台灣唔一樣, 台灣好多都係車隊車, 但係香港好多都係自己車。香港既 UBER 司機真係乜人都人, 有D 係真係鐘意楂車, 有人係PART TIME, 有D係老闆, 二當家遇到個女司機話自己每人跑10 HRS, 接完老公番工到老公收工既時間就跑 UBER, 又遇到個車房老闆, 話等小朋友放學, 所以中間就接一兩單。 最近二當家坐UBER 時, 咁O岩遇著工程老闆, 佢話無工開所以楂下 UBER, 傾開計, 知道佢住附近屋苑, 雙租族, 佢話自己每月駛費成 20萬, 聽到二當家呆左, 供緊2層樓, 供緊2架車, 俾緊2個車位既租, 剩係以上都已經10皮, 仲有佢自己公司既日常開支, 家庭同小朋友既開支, 20萬真係差唔多。 二當家即刻諗起前幾日既一篇文章, 月入 18萬既窮中層, 今日就俾二當家遇到月支出 20 萬既老闆。 二當家問佢點解咁勇, 佢話好景果期內地企業來港真係送錢俾你駛, 根本唔睇價錢, 佢試過一單 JOB 執8 球野 😱。咁唔怪得啦, 不過今時唔同往日, 佢話有D 同行新年過後都無單接, 佢D 老闆都睇 COST 睇到好緊, 可以唔做既就唔做, 或者係內地搵師父做, 人工平 6 成, 點鬥。
另外二當家有個台灣同事, 話近期買左樓, 參加左「青年安心成家購屋優惠貸款」, 一聽內容真係呆左。我個同事月入至6萬台幣, 聽聞過左寬限期剩係供樓都要5萬 (應該係用埋低自備, 即係發展商既呼吸 PLAN), 咁二當家問同事, 乜台灣無入息供款比例既要求咩, 點知…係真係無……..二當家真係聽到痴晒線, 供款玩到 40年, 頭5年仲可以供息唔供本, 加埋發展商既助攻, 唔駛睇都知泡沫來臨。
